Համառոտ բովանդակություն

Թրեյնինգը բաղկացած է հետևյալ հաջորդական ենթաբաժիններից․

• Ագրեսիվության մակարդակի, ագրեսիայի դրսևորման հիմնական ձևի նախնական գնահատում
• Ագրեսիա առաջացնող իրավիճակների վիզուալիզացիա՝ հետագա քննարկմամբ
• Ագրեսիա առաջացնող իրավիճակների վերլուծություն
• Ագրեսիվ վարքաձևերի մոդելավորում և խաղարկում
• Ագրեսիվ վարքի կառավարման համապատասխան մոտեցումների ներկայացում
• Եզրափակիչ գնահատում և արդյունքների արձանագրում

Թրեյնինգի նպատակը, խնդիրները

Թրեյնինգային ծրագրի հիմնական նպատակն է անձի մոտ ձևավորելու և զարգացնելու ագրեսիվ վարքի կառավարման հիմնական մեխանիզմները և մոտեցումները։ Նպատակից ելնելով առաջադրվել են հետևյալ խնդիրները․

• Ագրեսիայի մակարդակի նվազեցմանը ուղղված աշխատանքներ
• Ագրեսիայի կառուցողական վերաուղղորդման կարողությունների զարգացում
• Ագրեսիայի կառավարման մեխանիզմների զարգացում
• Ագրեսիվ վարքի կառավարման համապատասխան մոդելների յուրացման ապահովում

Կառուցվածքը և նկարագրությունը

Սույն թրեյնինգային ծրագիրը բաղկացած է ծանոթացման և նախնական գնահատման, բուն հոգեվարժանքների և եզրափակիչ գնահատման փուլերից։ Նախնական գնահատման փուլում համապատասխան հոգեբանական մեթոդներով գնահատվում է ագրեսիվության մակարդակը, ագրեսիվ վարքի դրսևորման ինտենսիվությունն ու հաճախականությունը, ագրեսիայի հաղթահարման առկա մոտեցումները, այլընտրանքային մոդելների վերաբերյալ պատկերացումները։

Հոգեվարժանքների փուլում՝ հիմնվելով նախնական գնահատման տվյալների վրա, նախագծվում և իրականացվում են նպատակահարմար հոգեբանական տեխնիկաները, մոդելավորվում և խաղարկվում են համապատասխան իրավիճակները։ Յուրաքանչյուր իրավիճակ խաղարկելուց հետո կատարվում է քննարկում, որն եզրափակվում է իր ամփոփումներով և եզրահանգումներով։ Անրաժեշտության դեպքում որոշ իրավիճակներ կարող են խաղարկվել մի քանի անգամ։

Եզրափակիչ գնահատման փուլում գնահատումը իրականացվում է նույն գործիքներով, ինչպես նախնական գնահատման փուլում, այնուհետև կատարվում է համեմատական վերլուծություն և համապատասխան արդյունքների արձանագրում։

Ակնկալվող արդյունքները

Հոգեբանական թրեյնինգի ավարտին շահառուի մոտ կնվազի ագրեսիվության մակարդակը, կզարգանան ագրեսիայի կառավարման մեխանիզմները, կտիրապետի ագրեսիայի կառուցողական վերաուղղորդման հմտություններին և կյուրացնի ագրեսիվ վարքի կառավարման հիմնական մոդելները։