Արդարադատության նախարար Գրիգոր Մինասյանի գլխավորությամբ՝ նախարարության աշխատակազմը և նախարարության համակարգման ներքո գտնվող մարմիններն ու կազմակերպությունները մասնակցել են կառավարման հմտությունների բարելավմանը և ներքին կառավարման հարցերին նվիրված վերապատրաստում-աշխատաժողովին:

Աշխատաժողովի նպատակն է բարելավել և կատարելագործել Արդարադատության նախարարության ղեկավար կազմի կառավարման և առաջնորդության հմտություններն ու կարողությունները, առկա խնդրահարույց իրավիճակների մասնագիտական վերլուծության միջոցով զարգացնել կառավարչական հմտությունները:

Արդարադատության նախարար Գրիգոր Մինասյանն աշխատաժողովի բացման խոսքում ընդգծել է հանրային կառավարման և հատկապես արդարադատության ոլորտում կառավարման հմտությունների և արդի մեթոդների կիրառման կարևորությունը: Նախարարն առաջնային է համարել նաև նախարարության աշխատակիցների կարողությունների զարգացման շարունակականությունը՝ որպես ոլորտային բարեփոխումների արդյունավետ իրականացման գրավական:
Վերապատրաստումները վարել է հասարակական գիտությունների թեկնածու, միջազգային որակավորումներ ունեցող Մարդկային ռեսուրսների մասնագետ և քոուչ, թրեյներ, խորհրդատու, «Cascade People & Business» ընկերության հիմնադիր և գլխավոր տնօրեն Արփի Կարապետյանը, իսկ նախարարության ներքին կանոնակարգի նախագծային կարգավորումները ներկայացրել է «Օրենսդրության զարգացման կենտրոն» հիմնադրամի տնօրեն Տիգրան Դադունցը:

Աշխատաժողովը կազմակերպվել է Արդարադատության նախարարության, Քաունթերփարթ Ինթերնեյշնլի «Աջակցություն Օրենսդրության զարգացման կենտրոն հիմնադրամին» ծրագրի և ԵՄ «Աջակցություն Հայաստանում արդարադատության ոլորտի բարեփոխումներին. 2-րդ փուլ» ծրագրի շրջանակներում: