20/10/2017

ՀՀ արդարադատության նախարար Դավիթ Հարությունյանը հոկտեմբերի 20-ին հանդիպել է Վրաստանի պատիժների կատարման, պրոբացիայի և իրավական օգնության հարցերի նախարար Կախա Կախիշվիլիին:
Նախարար Հարությունյանը շնորհակալություն է հայտնել Կախիշվիլիին ջերմ ընդունելության ու արդյունավետ համագործակցության համար և նշել, որ Հայաստանն ու Վրաստանը ոչ միայն նույն անցյալն, այլև ներկայում, հատկապես իրավական ոլորտում, նույն մարտահրավերներն ունեն, որոնց դիմակայելու լավագույն տարբերակներից մեկը հաջողված փորձի փոխանակումն է: 
Վրաստանի պատիժների կատարման, պրոբացիայի և իրավական օգնության հարցերի նախարար Կախա Կախիշվիլին, ողջունելով ՀՀ արդարադատության նախարարին, ընդգծել է, որ երկու երկրների նպատակը մեկն է՝ կարճ ժամանակահատվածում հասնել խնդիրների լուծմանը:

Հանդիպման ընթացքում նախարարները քննարկել են երկու երկրների պրոբացիոն ծառայություններին վերաբերող մի շարք հարցեր, մասնավորապես, անդրադարձել պրոբացիոն ինստիտուտի ներդրման վրացական փորձին:

Նախարար Կախիշվիլին ներկայացրել է պրոբացիոն  ծառայության արդյունավետության բարձրացմանը, քրեակատարողական հիմնարկների բարեփոխմանն ու ՔԿՀ-ներում բժշկական ծառայությունների որակի բարելավմանն ուղղված իրենց աշխատանքը: Նա կարևորել է Հայաստանի ՔԿՀ-ներում էներգախնայողությանն ուղղված ծրագիրը և դրան ծանոթանալու  ցանկություն է հայտնել՝ Վրաստանի ՔԿՀ-ներում այն իրագործելու հնարավորությունը քննարկելու համար: 

Նախարար Հարությունյանը պրոբացիոն ոլորտում  վրացական կողմի իրականացրած աշխատանքների արդյունավետությունը բարձր է գնահատել, կարևորել Վրաստանի ունեցած ձեռքբերումներն ու ընդգծել փորձի փոխանակման  ու արդյունավետ համագործակցության անհրաժեշտությունը:

Հանդիպման ավարտին նախարարները համագործակցությունը խորացնելու պատրաստակամություն են  հայտնել:

Աղբյուրը՝  http://moj.am/article/1867